E momoli atu ai sina faamatalaga I taualumaga o le faigamalaga a le Au folau mai le Pasefika, faatasi ai ma le Vaatele o Samoa le Gaualofa.
E fai atu le tusi lenei ae o le lona lima ai lea o aso talu ona malolo le va’a I le aai o Cabos i Mexico.
O se vaaiga e fou i se vaega o le tatou auvaa aua o le taimi muamua I lea foi ituaiga o matagofie e aulelei ai foi lea aai pe’a faatusa atu isi o tatou atunuu.
Ua lauiloa foi ia I lona lanulauava, mama ma le talimalo lelei.
O le tala I le auvaa, Na taunuu loa le vaa i Cabo ma vavae matou I uati I le ta’I ono itula.
Ia o taimi vaovaogata lava ia aua ua taunuu i pa’umatu.
Ma sa molimauina ai lava le oso faalava mai foi o le tama lea o fealoalofa’I i isi sifi o aso ta'itasi.
O le aso Lulu lenei I Cabos e tuua ai le fanua nei, ae agai atu i lesi motu I Mexico lava. ,
O le tala fo’I I mea taumafa e tausi ai le soifua maloloina o le auvaa, e lelei atoa, vagana ai o lo’o misia tele e matou ni nai fasitalo, ulu, fa’I , se faalifu ufi piiniu, se saka talo e le faalifua e momoli e le luau ulo, poo se fasi taamu e goto I le faiai ipu. E le maua lava tatou lava taumafa e to’a ai le moa..
E iai foi o matou faafitauli I luga o le vaa ae o lo’o faigofie lava ona foia ma toe sologa lelei aso uma.
O le faamalosi tele I le auvaa o le Vaatele Gaualofa, ina ua usi le matou tapuaiga I le taaloga a le Manu Samoa ma manumalo I le taaloga I Amerika ma Niusila..
E fou fo’I taliga o tagata o le motu le pisapisao o le tapuiga a le auvaa a Samoa, aua o loo iai foi iinei ma auvaa mai Maori Niusila I le folauga lenei.
Ae faamalo faafetai I le Manu Samoa taito’afitu, ua matou fiafia uma ai lava, ma faigofie ai foi ona see la o le tatou sa, i lesi afe ma ona tupu maila tautai, o loo folifoli atu iai. .
Ia manuia lo tatou atunu’u ae ola le auva’a I le alofa o le Atua.
Soifua, Faapau ma le auva’a Gaualofa.
No comments:
Post a Comment